換個舞台一樣咁成功!十大運動員轉型藝人你識幾多個?
2020年03月16日00:00

體壇下一站:演藝舞台

運動員同明星有一個共通點:一樣都係公眾人物。只不過明星嘅舞台係大銀幕、電視、雜誌,而運動員嘅舞台就係奧運同各個運動賽事上。唔少本身外表比較出眾,又或者有一定人氣嘅運動員退役之後都會成為藝人,開拓事業另一條路。今日DailyView用網路大數據帶大家一齊睇吓討論度最高嘅十個運動員轉型藝人成功例子有邊個啦~

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

10 司徒瑞祈(320筆)

司徒瑞祈爸爸係國際游泳裁判姐姐又係前港隊成員出身自由泳世家,仲係方力申嘅師弟。10歲就已經代表香港出賽,後來機緣巧合加入演藝圈,健康陽光男孩嘅形象令佢有機會參與拍攝當時好紅嘅劇集《赤沙印記@四葉草2》。之後都有參與好多大家耳熟能詳嘅劇集包括《老表你好Hea》等,幾年前慢慢退出娛樂圈,創業賣小食,再闖另一片天~

image source:Facebook/2011香港公開冬泳錦標賽

9 楊文蔚(625筆)

1994年出世嘅楊文蔚年紀輕輕就已經係香港女子跳高紀錄保持者,更加係香港第一位全職跳高女運動員。大家應該對佢唔陌生,因為除咗運動員身分之外,佢本身仲係一位模特兒,所以大家應該都曾經喺唔同嘅廣告上面見過佢㗎啦。多次打破個人紀錄同香港紀錄,令佢之前受到好多關注,外表甜美樂觀散發正能量嘅性格好受大家歡迎。

image source:Facebook/ 楊文蔚 Cecilia Yeung

8 梁漢文(3127筆)

唔講都唔知,入咗行已經超過30年嘅梁漢文原來曾經係香港足球代表隊嘅青年軍,舅父尹志強仲係香港足球代表隊已故球員。五歲開始踢波,16歲就入選香港代表隊青年軍,細個嘅時候一路都好專注參與足球運動,不過後來因為鍾意唱歌後尾參加新秀歌唱比賽而入行。雖然最後冇成為足球員,不過成功入行做歌手,都實現咗自己另一個理想啦!

image source:Facebook/梁漢文 Edmond Leung

7 歐鎧淳(3381筆)

年僅16歲就代表香港參加2008北京奧運,雖然冇得到獎牌,不過都打破咗兩項香港捷泳嘅成績,以奧運呢種大型國際賽事嚟講,真係非常好嘅表現啦!之後參加好多唔同運動會都攞到唔錯嘅成績,2008年北京奧運之後2次代表香港出戰奧運,本身都備戰緊東京奧運。喺美國柏克萊大學讀書嘅佢成績好形象好,所以都好受廣告商歡迎,有客串電影,亦都曾經擔任張敬軒MV女主角。

image source:Facebook/ 歐鎧淳 (Stephanie Au)

6 余德丞(3865筆)

余德丞係香港游泳代表隊嘅成員,曾經被譽為:方力申同司徒瑞祈嘅接班人。而家加入咗TVB,先後參與過唔同嘅電視劇,由於運動員嘅身份同陽光形象,除咗一般節目嘅主持之外,佢亦都有曾擔任好多體育節目嘅主持同埋一啲評述員。2015年游泳錦標賽評述員,同2016里約奧運亦都有擔任外景主持,後生有型嘅佢廣告作品都唔少㗎。上年頒獎典禮更加得到最佳節目主持,轉換跑道發展都幾成功呀!

image source:Facebook/ Dickson Yu 余德丞

5 陳建安(4267筆)

當年一首《天梯》唱到街知巷聞,以無伴奏演唱嘅演繹方式令大家留下深刻印象嘅C AllStar,其中一名成員陳健安——安仔,其實係香港係前港隊足球員,更加係花式足球嘅創辦人。14到18歲係香港足球青年軍, 2007到2009年球季更加係香港足球聯賽嘅甲組足球員。 因為參加一個歌唱比賽入圍最後四強而同其他入圍者組成組合出道,雖然近年組合活動比較少,不過各自個人發展都幾活躍,單飛作品亦有唔錯嘅成績。

image source:Facebook/ On C AllStar

4 何雁詩(5994筆)

第一屆超級巨星咁受歡迎,入面嘅參賽者好多後來都成為藝人,何雁詩就係其中一個代表。而佢本身係一名高爾夫球運動員,六歲開始打高爾夫球,10歲加入港隊,2010年仲代表香港參加廣州亞運高爾夫球項目,雖然細細個就加入港隊,不過14歲開始佢都有學習音樂亦都喺伯樂音樂學院完成好多個聲樂相關課程。16歲參加超級巨星之後簽約TVB,投身演藝事業,除咗音樂作品,都有參與唔少電視劇嘅演出。

image source:Facebook/ Stephanie Ho 何雁詩

3 黃澤鋒(8715筆)

黃澤鋒喺1987年藝員訓練班畢業就加入TVB,喺演藝圈發展咁多年,參演過好多電視劇,而佢可以話係早期運動員轉型藝人嘅成功例子。1975年被發掘培育成為運動員,其後亦都有代表香港出戰美國賽事,喺香港渡海泳多次奪冠。雖然投身演藝圈,但佢無荒廢自己運動細胞,除咗游水之外,黃澤鋒係武術方面都唔講得少。分別拜多位大師、宗師習武,更考獲世界武術師範級6段泰拳教練證書、拳證同裁判資格。

image source:Facebook/ 黃澤鋒

2 方力申(14805筆)

被稱做香港「飛魚王子」嘅方力申係退役港隊游泳代表大家都知啦,曾經擁有九項香港游泳紀錄,至今有兩項嘅紀錄仍然未被打破。15歲去斯里蘭卡出賽,後來去美國嘅中學進修並喺當地進行游泳訓練,2000年奧運後加入演藝圈,一邊讀大學一邊唱歌一邊繼續運動員身份,後來退役投身做全職藝人。健康正面形象令佢一出道就吸引大眾目光,參演電影同音樂作品都好受歡迎。今個月初小方宣布再戰泳壇,參戰下年世錦賽,喺到祝小方可以拎到好成績!

image source:Facebook/ Alex Fong 方力申

1 王嘉爾(15809筆)

就算大家未見過王嘉爾,都可能聽過呢個名。出生於運動世家爸爸係中國劍擊隊成員,亞運奪金,亦都係香港劍擊隊總教練,而媽媽就係中國體操隊成員,王嘉爾作為港隊代表,曾經係青年亞洲劍擊中排名第一位同埋青少年世界劍擊排名11位。當年喺亞洲青年劍擊錦標賽奪得亞洲金牌之後,放棄2012倫敦奧運同美國大學嘅錄取通知,通過選拔去咗韓國成為練習生後來再以韓團出道,喺好多節目上都有分享運動員經歷同表演劍擊。

image source:Twitter / @tuanxcoco

【香港網路溫度計調查結果之圖文,未經授權請勿轉載、改寫】

分析說明:

本研究資料由《KEYPO大數據關鍵引擎》提供,分析時間範圍為2019年03月14日至2020年03月12日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『運動員藝人』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

推薦文章︰

血汗勞工又低薪?十大要有夢想先撐得住嘅工作

網傳武漢病患未死遭焚化慘叫 網友用科學解釋:沒事的

關注我們Facebook專頁